金融危機或者經濟衰退，其實都係先使未來錢嘅代價，你要預先享受本應唔屬於你嘅嘢，遲早有日要還。當成個社會集體要還，股票冧樓價冧失業率上升呢啲金融危機同經濟衰退嘅現象就湧晒出嚟。

你試諗吓，如果世界係冇借貸，你有幾多使幾多，仲點會有資產泡沫債務危機？大家都安分守己，不過代價就係經濟發展龜速，人類生活質素下降。

香港人最驚無份工

所以，經濟衰退金融危機就係你可以急速享受未來嘅成本。有本事享受未來嘅同時，避過找數成本，咁你咪叻仔囉。你正確思想係點樣逃避找數，唔係去逃避金融危機同經濟衰退，避無可避。

香港人最驚嘅唔係樓跌股票跌，最驚係冇咗份工。有份工，死慳死抵都會供層樓，股票輸咗就擺埋一邊冇眼睇。假如冇咗份工就世界末日，守都冇得守。只要失業率沒有如火箭飆升，樓同股票都會有班擁𧄌守住。

而家通行都請唔到人，唔夠人用，未來就算經濟衰退，生意唔好，未必等於搵唔到嘢做，大前提當然係你要將就一下。

經濟唔好，過去三五年一鑊，有番咁上下年紀嘅，隨時見過幾次，工都轉過幾份。大學畢業生更甚，無乜邊幾個可以一讀完書出嚟就搵到份dream job，大多數人成世都係做份唔想返工嘅工。有咁清楚嘅諗法，就唔使點怕第時環境唔好。

三十歲前發達其實係害咗你，四十歲先開始有錢剩，千祈唔好覺得比人慢，你要感恩呀。有錢過手留唔住，唔算係你嘅。

有錢喺手反而冇乜嘢想買，咁你就真係富有喇。我都話做金融呢行睇得最多嘅係人，有錢冇錢嘅人見得多，最開心嗰個絕對唔係最有錢嗰個。人係長途賽，死咗嗰日先埋單計數。中間有乜起伏，小意思啫。